NARSES Persarum Rex

NARSES Persarum Rex

post patrem Varanem III. A. C. 295. Imperatoribus, contra rebelles, occupatis, Mesopotamiam Armeniamque rapuit; Maximinianum etiam Galerium, a Diocletiano missum, vicit: qui tamen duobus aliis proeliis superior, Narsetem cum uxore, liberis, sororibus, etc. in potestatem redegit, recuperatâ Mesopotamiâ et quinque aliis provinciis, trans Tigrim, imperio adiectis. Euseb. in Chron. Eutrop. l. 9. Regnavit ann. 7. sucessore Ormisdate I. quem vide, nec non Eutropium loc. cit. Ceterum Ναρσῆς Agathiae, Aur. Victori et Ammiano Narseus, l. 23. Maximiano antehac Caesari, cum Narseo Persarum Rege iam congressuro. Ita enim MSS. ubi editur, Narse. Idem nomen Ducis Persici, l. 24. Cum Tigrane, et Surrena et Narseo, potissimis Ducibus. Sic eadem, Perseus, Perses, Persa. Augustin. de Civ. Dei l. 3. c. 11. Retulerunt tale prodigium et Antiochi et Persidis bellô, in eodem apparuisse figmento. Ubi pro Persidis alii Xerxes: Lud. Vives Persae: sed membranae Noricae Persis, idque verum. Similiter l. 18. c. 18. Et septimi Regis Triopae fil. Iasus et Rex nonus Sthenelas sive Stheneleus sive Sthenelus: varie quippe in diversis Auctoribus invenitur. Et idem tamen est nomen, adiungendaque quarta terminatio, Stenelaus, quae exstat apud Polybium l. 4. etc. Vide Ioh. Frid. Gronov. Observ. l. 4. c. 15. ubi plura habes in eam rem egregia.